ગ્રીન કાર્ડની લાલચમાં નકલી લૂંટ! અને સાચો કેસ!
હાલમાં અમેરિકામાં એવો જ એક ચોંકાવનારો કિસ્સો સામે આવ્યો છે, જેમાં ગેરકાયદેસર રીતે રહેતા 11 ગુજરાતી ભારતીય નાગરિકો સામે વિઝા ફ્રોડના ગંભીર આરોપો મૂકવામાં આવ્યા છે. આ તમામ પર આરોપ છે કે તેઓએ ‘U વિઝા’ મેળવવા માટે નકલી સશસ્ત્ર લૂંટનું નાટક રચ્યું હતું. સામાન્ય રીતે ‘U વિઝા’ મળ્યા પછી વ્યક્તિને વર્ક પરમિટ મળે છે અને પાંચથી દસ વર્ષમાં ગ્રીન કાર્ડ મેળવવાનો રસ્તો પણ ખુલી શકે છે અમેરિકન ફેડરલ પ્રોસિક્યુટર્સ દ્વારા આ સમગ્ર કૌભાંડ બહાર લાવવામાં આવ્યા બાદ ભારતીય સમુદાયમાં પણ આ મામલો ભારે ચર્ચાનો વિષય બન્યો છે.
‘U વિઝા’ શું છે અને કેમ મહત્વનું છે?
અમેરિકામાં ‘U નોન-ઇમિગ્રન્ટ વિઝા’ એટલે કે ‘U વિઝા’ ખાસ કરીને એવા લોકો માટે બનાવવામાં આવ્યો છે, જે કોઈ ગંભીર ગુનાનો ભોગ બન્યા હોય અને પોલીસને તપાસમાં મદદ કરે. આ વિઝા હેઠળ વ્યક્તિને અમેરિકામાં કાયદેસર રીતે રહેવાની તથા કામ કરવાની મંજૂરી મળે છે. સામાન્ય રીતે ‘U વિઝા’ મળ્યા પછી વ્યક્તિને વર્ક પરમિટ મળે છે અને પાંચથી દસ વર્ષમાં ગ્રીન કાર્ડ મેળવવાનો રસ્તો પણ ખુલી શકે છે. એટલે જ ઘણા ઇમિગ્રન્ટ્સ માટે આ વિઝા એક મહત્વપૂર્ણ તક માનવામાં આવે છે. પરંતુ આ કાયદાનો જ દુરુપયોગ કરીને કેટલાક લોકો દ્વારા નકલી ગુનાઓ રચીને પોતાને ‘ભોગ બનનાર’ તરીકે રજૂ કરવાની યોજના બનાવવામાં આવી હોવાનું તપાસમાં બહાર આવ્યું છે.
કેવી રીતે રચાયો નકલી લૂંટનો પ્લાન?
અમેરિકન તપાસ એજન્સીઓ મુજબ, આ સમગ્ર કૌભાંડ પાછળ એક સંકલિત નેટવર્ક કામ કરતું હતું. આરોપ છે કે ‘રામભાઈ પટેલ’ નામના એક વ્યક્તિએ આ યોજના તૈયાર કરી હતી. આ યોજના મુજબ, વિવિધ કન્વીનિયન્સ સ્ટોર, લિકર સ્ટોર અને ફાસ્ટ ફૂડ રેસ્ટોરન્ટમાં નકલી લૂંટનું નાટક કરવામાં આવતું હતું. એક વ્યક્તિ નકલી હથિયાર લઈને સ્ટોરમાં પ્રવેશતો અને સ્ટોરના કાઉન્ટર પરથી રોકડ રકમ લઈ ભાગી જતો. આ સમગ્ર ઘટનાક્રમ સ્ટોરના CCTV કેમેરામાં કેદ થતો. આ પછી સ્ટોરના કર્મચારીઓ અથવા માલિકો થોડા સમય સુધી રાહ જોઈને પોલીસને ફોન કરીને લૂંટની ઘટના નોંધાવતા. તેઓ પોતાને આ ગુનાનો ‘શિકાર’ હોવાનું બતાવતા અને પછી ‘U વિઝા’ માટે અરજી કરતા. તપાસકર્તાઓના જણાવ્યા અનુસાર, આ યોજના હેઠળ ઓછામાં ઓછા છ અલગ અલગ સ્ટોરમાં આવી નકલી લૂંટની ઘટનાઓ ગોઠવવામાં આવી હતી.
પૈસાની લેવડદેવડથી ચાલતું કૌભાંડ
તપાસમાં બહાર આવ્યું છે કે આ સમગ્ર યોજનામાં પૈસાની મોટી લેવડદેવડ પણ થતી હતી. જે લોકો ‘ભોગ બનનાર’ તરીકે ભાગ લેતા હતા તેઓ રામભાઈને પૈસા આપતા હતા. પછી રામભાઈ સ્ટોરના માલિકોને તેમના સ્ટોરમાં લૂંટનું નાટક કરવા માટે નાણાં ચૂકવતા હતા. લૂંટ કરનાર અને તેને ભાગવામાં મદદ કરનાર ડ્રાઈવર પણ આ ગેંગનો ભાગ હતા. અમેરિકન તપાસ એજન્સીઓએ અગાઉ જ આ ‘લૂંટારુ’ અને ડ્રાઈવરની ધરપકડ કરીને તેમને દોષિત ઠેરવ્યા છે. હવે તપાસના આધારે અન્ય 11 લોકો સામે વિઝા ફ્રોડના કેસ નોંધવામાં આવ્યા છે.
આરોપીઓના નામ અને તેઓ ક્યાં રહેતા હતા
અમેરિકન ન્યાય વિભાગે જાહેર કરેલી માહિતી મુજબ નીચેના 11 ભારતીય નાગરિકો સામે વિઝા ફ્રોડના કાવતરાનો આરોપ મૂકવામાં આવ્યો છે:
- જિતેન્દ્રકુમાર પટેલ (39 વર્ષ) – માર્શફિલ્ડ, મેસેચ્યુસેટ્સમાં ગેરકાયદેસર વસવાટ
- મહેશકુમાર પટેલ (36 વર્ષ) – રેન્ડોલ્ફ, મેસેચ્યુસેટ્સમાં ગેરકાયદેસર વસવાટ
- સંજયકુમાર પટેલ (45 વર્ષ) – ક્વિન્સી, મેસેચ્યુસેટ્સમાં ગેરકાયદેસર વસવાટ
- દીપિકાબેન પટેલ (40 વર્ષ) – વેમાઉથ, મેસેચ્યુસેટ્સમાં ગેરકાયદેસર રીતે રહેતા હતા, જેમને હવે ભારત ડિપોર્ટ કરવામાં આવ્યા છે
- રમેશભાઈ પટેલ (52 વર્ષ) – યુબેન્ક, કેન્ટુકીમાં ગેરકાયદેસર વસવાટ
- અમિતાબહેન પટેલ (43 વર્ષ) – પ્લેનવિલે, મેસેચ્યુસેટ્સમાં ગેરકાયદેસર વસવાટ
- રોનકકુમાર પટેલ (28 વર્ષ) – મેરીલેન્ડ હાઇટ્સ, મિઝોરીમાં ગેરકાયદેસર વસવાટ
- સંગીતાબહેન પટેલ (36 વર્ષ) – રેન્ડોલ્ફ, મેસેચ્યુસેટ્સમાં ગેરકાયદેસર વસવાટ
- મિનકેશ પટેલ (42 વર્ષ) – પેરીસબર્ગ, ઓહાયોમાં ગેરકાયદેસર વસવાટ
- સોનલ પટેલ (42 વર્ષ) – પેરીસબર્ગ, ઓહાયોમાં ગેરકાયદેસર વસવાટ
- મિતુલ પટેલ (40 વર્ષ) – વુસ્ટર, મેસેચ્યુસેટ્સમાં ગેરકાયદેસર વસવાટ
આ તમામ લોકો અમેરિકાના વિવિધ રાજ્યોમાં ગેરકાયદેસર રીતે રહેતા હતા અને વિઝા ફ્રોડના કાવતરામાં સંડોવણી હોવાનો આરોપ છે.
કાયદાકીય કાર્યવાહી અને સંભવિત સજા
અમેરિકન કાયદા મુજબ વિઝા ફ્રોડના કાવતરાના આરોપ ખૂબ ગંભીર માનવામાં આવે છે. જો આ કેસમાં આરોપીઓ દોષિત સાબિત થાય તો તેમને પાંચ વર્ષ સુધીની જેલ સજા થઈ શકે છે. તે સિવાય લગભગ $250,000 (ભારતીય રૂપિયામાં આશરે 2 કરોડથી વધુ) સુધીનો દંડ પણ ફટકારવામાં આવી શકે છે. સજા પૂર્ણ થયા બાદ આરોપીઓને અમેરિકામાંથી ડિપોર્ટ કરવામાં આવવાની શક્યતા પણ છે. હાલમાં આ સમગ્ર કેસ ફેડરલ કોર્ટમાં ચાલી રહ્યો છે અને અંતિમ નિર્ણય કોર્ટ દ્વારા જ લેવામાં આવશે.
