મેઘરાજાનું રૌદ્ર સ્વરૂપ

ગામડાં પાણીમાં ગરકાવ, શહેરમાં રાહત કામગીરી યુદ્ધના ધોરણે

01 August 2026 Gujarat Updates Team: દક્ષિણ ગુજરાતમાં મેઘરાજાએ ફરી એકવાર રૌદ્ર સ્વરૂપ ધારણ કરતાં સુરત જિલ્લો છેલ્લા 24 કલાક દરમિયાન અતિભારે વરસાદના કારણે જળબંબાકાર બની ગયો છે. સતત વરસી રહેલા વરસાદ, ઉપરવાસમાંથી આવતી પાણીની વિશાળ આવક અને નદીઓના વધતા જળસ્તરને કારણે જિલ્લાના અનેક તાલુકાઓમાં પૂર જેવી સ્થિતિ સર્જાઈ છે. શહેર અને ગ્રામ્ય વિસ્તારોમાં અનેક મુખ્ય માર્ગો પાણીમાં ગરકાવ થયા છે, જ્યારે અનેક વિસ્તારોમાં લોકો પોતાના ઘરોમાં જ ફસાઈ ગયા હતા. વહીવટી તંત્ર, સુરત મહાનગરપાલિકા (SMC), SDRF અને NDRFની ટીમો સતત બચાવ અને રાહત કામગીરીમાં વ્યસ્ત છે. રાજ્ય સરકાર અને જિલ્લા વહીવટીતંત્ર દ્વારા હાઈ એલર્ટ જાહેર કરી તમામ વિભાગોને સજ્જ રાખવામાં આવ્યા છે. તાજેતરના અહેવાલો મુજબ સુરત જિલ્લો રાજ્યમાં સૌથી વધુ વરસાદ મેળવનારા જિલ્લાઓમાં સામેલ રહ્યો છે.

24 કલાકમાં વરસાદે તોડ્યા તમામ અંદાજ
છેલ્લા 24 કલાક દરમિયાન સુરત જિલ્લામાં અનેક વિસ્તારોમાં અત્યંત ભારે વરસાદ નોંધાયો છે. રાજ્યના SEOC (State Emergency Operation Centre) અને સ્થાનિક તંત્રના સતત મોનિટરિંગ હેઠળ વરસાદના આંકડાઓ પર નજર રાખવામાં આવી રહી છે. સુરત શહેરના અનેક વિસ્તારોમાં પાણી ભરાવાની સ્થિતિ સર્જાઈ છે. સતત વરસી રહેલા વરસાદને કારણે શહેરના નીચાણવાળા વિસ્તારો, ગ્રામ્ય માર્ગો અને નદીકાંઠાના ગામોમાં પાણી ફરી વળ્યા છે. ભારતીય હવામાન વિભાગે આગામી કલાકોમાં પણ ભારે વરસાદની સંભાવના વ્યક્ત કરતાં લોકોને સાવચેત રહેવાની સલાહ આપી છે.

સુરત શહેરના અનેક વિસ્તારોમાં પાણી ભરાયા, મનપાની રાહત કામગીરી તેજ
સુરત શહેરમાં સતત વરસાદના કારણે અનેક નીચાણવાળા વિસ્તારોમાં પાણી ભરાવાની સમસ્યા ગંભીર બની છે. અડાજણ, રાંદેર, કતારગામ, વરાછા, પુણા, ગોડાદરા, ઉધના, પાંડેસરા, લિંબાયત, ડિંડોલી, ભેસ્તાન, પરવત પાટિયા, સચિન GIDC, મગદલ્લા, અલથાણ, ભીમરાડ, પાલ, વેસુ, સરથાણા, યોગીચોક અને પાલનપુર પાટિયા સહિતના અનેક વિસ્તારોમાં વરસાદી પાણી ભરાતા વાહનવ્યવહાર અને દૈનિક જનજીવન પ્રભાવિત થયું છે. સુરત મહાનગરપાલિકાની ટીમો ડી-વોટરિંગ પંપ દ્વારા પાણીના નિકાલ માટે સતત કામગીરી કરી રહી છે, જ્યારે નીચાણવાળા વિસ્તારોમાં વધારાની ટીમો અને મશીનરી તૈનાત કરીને સ્થિતિ પર સતત નજર રાખવામાં આવી રહી છે.

કોસંબા–કિમ ગાયકવાડી માર્ગ પાણીમાં ગરકાવ
ભારે વરસાદના સૌથી મોટા પ્રભાવોમાંથી એક કોસંબા અને કિમ ગામને જોડતો મહત્વપૂર્ણ ગાયકવાડી માર્ગ સંપૂર્ણપણે બંધ થઈ જવો રહ્યો છે. કિમ નદીમાં ઉપરવાસમાંથી સતત આવતાં પાણીના કારણે નદીનું જળસ્તર જોખમી સપાટીએ પહોંચી ગયું છે. પરિણામે પૂરના પાણી સીધા જ ગાયકવાડી માર્ગ પર ફરી વળ્યા હતા. સુરક્ષાને ધ્યાનમાં રાખીને તંત્રએ માર્ગ સંપૂર્ણપણે બંધ કરી દીધો છે. આ માર્ગ રોજ હજારો નોકરીયાતો, વિદ્યાર્થીઓ અને વેપારીઓ માટે મુખ્ય સંપર્ક માર્ગ હોવાથી તેની અસર વ્યાપક જોવા મળી રહી છે. વાહનચાલકોને હવે 15થી20 કિલોમીટરનો વધારાનો ચકરાવો લેવો પડી રહ્યો છે, જેના કારણે સમય અને બળતણ બંનેનો ખર્ચ વધી ગયો છે.

ભારે વરસાદના કારણે કામરેજ તાલુકાના અનેક વિસ્તારોમાં પાણી ભરાવાની સ્થિતિ સર્જાઈ છે. કામરેજ, સેવણી, નવાગામ, લસકાણા, વલક, પાસોદરા સહિતના વિસ્તારોમાં રસ્તાઓ પર વરસાદી પાણી ફરી વળતાં વાહનવ્યવહાર પ્રભાવિત થયો છે. અનેક આંતરિક માર્ગો પર પાણી ભરાઈ જતાં લોકોને અવરજવરમાં ભારે મુશ્કેલી પડી રહી છે, જ્યારે ખેતરોમાં પાણી ભરાવાથી ખેડૂતોમાં પણ ચિંતાનો માહોલ જોવા મળી રહ્યો છે. જિલ્લા વહીવટી તંત્ર દ્વારા સ્થિતિ પર સતત નજર રાખવામાં આવી રહી છે અને જરૂરી સ્થળોએ રાહત કામગીરી હાથ ધરવામાં આવી છે.

અંબિકા નદીના જળસ્તરમાં વધારો, દક્ષિણ ગુજરાતમાં એલર્ટ
દક્ષિણ ગુજરાતમાં સતત વરસી રહેલા વરસાદની અસર હવે અંબિકા નદીમાં પણ જોવા મળી રહી છે. ઉપરવાસમાંથી પાણીની આવક વધતાં અંબિકા નદીનું જળસ્તર સતત ઊંચું જઈ રહ્યું છે. નવસારી અને આસપાસના નદીકાંઠાના વિસ્તારોમાં તંત્ર દ્વારા સતત મોનિટરિંગ કરવામાં આવી રહ્યું છે. જો આગામી કલાકોમાં વરસાદનું જોર યથાવત રહેશે તો નીચાણવાળા ગામોમાં પાણી ફરી વળવાની શક્યતાને ધ્યાનમાં રાખીને સ્થાનિક લોકોને સાવચેત રહેવા સૂચના આપવામાં આવી છે.

સુરત જિલ્લાના ઓલપાડ, માંડવી, કામરેજ, માંગરોળ, પલસાણા, બારડોલી, મહુવા અને ઉમરપાડા તાલુકાના અનેક ગામોમાં ભારે વરસાદને કારણે પૂર જેવી સ્થિતિ સર્જાઈ છે. કરવલી, કઠોડરા, કોસંબા, કિમ અને અન્ય નદીકાંઠાના ગામોમાં પાણી ફરી વળતાં વહીવટી તંત્ર દ્વારા સતત પેટ્રોલિંગ કરવામાં આવી રહ્યું છે. SDRF, NDRF અને સ્થાનિક તંત્રની ટીમો સંભવિત બચાવ કામગીરી માટે સંપૂર્ણ સજ્જ રાખવામાં આવી છે, જ્યારે નદીકાંઠાના ગામોમાં રહેતા લોકોને અનાવશ્યક બહાર ન નીકળવા અને તંત્રની સૂચનાઓનું પાલન કરવાની અપીલ કરવામાં આવી છે.

સુરત સહિત સમગ્ર દક્ષિણ ગુજરાતમાં વરસી રહેલા વરસાદના કારણે તાપી, કિમ, મિંધોળા, પૂર્ણા અને અંબિકા નદીઓમાં પાણીની આવકમાં સતત વધારો નોંધાઈ રહ્યો છે. ઉકાઈ ડેમમાંથી છોડવામાં આવી રહેલા પાણીના કારણે તાપી નદીનો પ્રવાહ વધુ તેજ બન્યો છે, જ્યારે કિમ અને મિંધોળા નદીઓના કિનારાના અનેક વિસ્તારોમાં સાવચેતીના પગલાં લેવામાં આવ્યા છે. જળસંપત્તિ વિભાગ, જિલ્લા વહીવટી તંત્ર અને આપત્તિ વ્યવસ્થાપન વિભાગ દ્વારા તમામ મુખ્ય નદીઓના જળસ્તર પર 24 કલાક નજર રાખવામાં આવી રહી છે.

માંડવી તાલુકામાં SDRFનું સફળ રેસ્ક્યૂ
માંડવી તાલુકાના કરવલી ગામમાં વરેહ નદીના પૂરના પાણી ગામમાં ઘૂસી જતાં ગંભીર સ્થિતિ સર્જાઈ હતી. અનેક ઘરો પાણીમાં ઘેરાઈ જતા સ્થાનિક લોકો ફસાઈ ગયા હતા.
જિલ્લા વહીવટી તંત્રની સૂચના બાદ SDRFની વાવ ટીમ અને તડકેશ્વર પોલીસની ટીમે તાત્કાલિક રેસ્ક્યૂ ઓપરેશન શરૂ કર્યું હતું. ભારે વરસાદ અને તીવ્ર પ્રવાહ વચ્ચે 15થી વધુ લોકોને સલામત રીતે બહાર કાઢીને સુરક્ષિત સ્થળોએ પહોંચાડવામાં આવ્યા હતા. સ્થાનિક તંત્રના ઝડપી પ્રતિસાદને કારણે કોઈ જાનહાનિ થઈ નહોતી.

ઓલપાડમાં પૂર જેવી સ્થિતિ
ઓલપાડ તાલુકાના કઠોડરા ગામમાં શિવ સાંઈ રેસીડેન્સી અને શિવસાગર સોસાયટીમાં વરસાદી પાણી ઘૂસી જતાં 10થી વધુ લોકો પોતાના ઘરોમાં ફસાઈ ગયા હતા પ્રાંત અધિકારી, મામલતદાર તથા સ્થાનિક વહીવટી ટીમ તરત ઘટનાસ્થળે પહોંચી હતી. SDRF દ્વારા બોટની મદદથી બચાવ કામગીરી શરૂ કરવામાં આવી હતી. સ્થાનિક લોકોને નીચાણવાળા વિસ્તારો ખાલી કરવાની સૂચના આપવામાં આવી છે.

સુરત મહાનગરપાલિકાની યુદ્ધના ધોરણે કામગીરી
શહેરમાં વરસાદી પાણીનો નિકાલ અને નાગરિકોની સુરક્ષા માટે સુરત મહાનગરપાલિકા સતત કાર્યરત છે.

મુખ્ય કામગીરી:

• પાણી ભરાવાની 75 ફરિયાદોમાંથી 37 સ્થળોએ સફળતાપૂર્વક પાણીનો નિકાલ
• 2,062 લોકોને સલામત સ્થળોએ ખસેડાયા
• 2,943 લોકોને આશ્રયસ્થાનોમાં ભોજન
• 5,760 ફૂડ પેકેટનું વિતરણ
• 27 આરોગ્ય ટીમો દ્વારા 13,041 ઘરોમાં સર્વે
• લગભગ 3.98 લાખ નાગરિકોની આરોગ્ય તપાસ
• 16 રેસ્ક્યૂ બોટ તૈનાત
• 5 NDRF અને 4 SDRF ટીમો સતત કાર્યરત
• 66 ડી-વોટરિંગ પંપ કાર્યરત
• 77 JCB મશીન દ્વારા રાહત કામગીરી
• 199 પડેલા વૃક્ષો દૂર કરીને માર્ગ ખુલ્લા કરાયા

આ કામગીરી શહેરમાં સ્થિતિને નિયંત્રણમાં રાખવા માટે મહત્વપૂર્ણ સાબિત થઈ રહી છે.

ઉકાઈ ડેમમાં સતત વધી રહેલી આવક
ઉપરવાસમાં ભારે વરસાદને કારણે ઉકાઈ ડેમમાં પાણીની આવક સતત વધી રહી છે. તાજેતરના આંકડા મુજબ

• ડેમ સપાટી : 319.98 ફૂટ
• પાણીની આવક : 1.60 લાખ ક્યુસેક

ડેમની સ્થિતિ પર સિંચાઈ વિભાગ સતત નજર રાખી રહ્યો છે.

તાપી નદીમાં પાણીનો જોરદાર પ્રવાહ
સુરત શહેરના વિયર કમ કોઝવે પર પાણીનો પ્રવાહ સતત વધી રહ્યો છે. હાલ

• કોઝવે સપાટી : 8.34 મીટર
• તાપીમાં છોડાતું પાણી : 1.50 લાખ ક્યુસેક

પાણી ફરી વળતાં કોઝવે વાહન વ્યવહાર માટે સંપૂર્ણપણે બંધ કરી દેવામાં આવ્યો છે.

આગામી 48 કલાક નિર્ણાયક
હવામાન વિભાગના અનુમાન મુજબ આગામી 24થી48 કલાક દરમિયાન દક્ષિણ ગુજરાતમાં વધુ ભારે વરસાદની શક્યતા છે. જેના કારણે

• નદીના જળસ્તરમાં વધારો
• નીચાણવાળા વિસ્તારોમાં પાણી ભરાવાની શક્યતા
• માર્ગ બંધ થવાની સ્થિતિ
• વધુ સ્થળાંતરની જરૂરિયાત

ઉભી થઈ શકે છે.

વહીવટી તંત્રની અપીલ
જિલ્લા વહીવટી તંત્રએ લોકોને અપીલ કરી છે કે

• અનાવશ્યક મુસાફરી ટાળવી
• નદી અને કોઝવે નજીક ન જવું
• તંત્રની સૂચનાઓનું પાલન કરવું
• અફવાઓથી દૂર રહેવું
• જરૂરિયાતે જ બહાર નીકળવું

ભારે વરસાદ, નદીઓમાં વધતું જળસ્તર, ઉકાઈ ડેમમાં સતત આવક અને અનેક ગામોમાં સર્જાયેલી પૂર જેવી સ્થિતિને ધ્યાનમાં રાખતાં સુરત જિલ્લો હજુ પણ હાઈ એલર્ટ પર છે. બચાવ કામગીરી સતત ચાલુ છે અને વહીવટી તંત્ર દરેક પરિસ્થિતિ પર નજર રાખી રહ્યું છે. રાજ્ય સરકાર, SMC, NDRF અને SDRF વચ્ચે સંકલિત કામગીરીના કારણે અનેક લોકોને સમયસર સુરક્ષિત સ્થળોએ ખસેડવામાં સફળતા મળી છે. જો આગામી કલાકોમાં વરસાદનું જોર યથાવત રહેશે તો પરિસ્થિતિ વધુ પડકારજનક બની શકે છે.

www.gujaratupdates.com

અમારી WhatsApp ચેનલ માં જોડાવો : Click karo
અમારી Telegram ચેનલ માં જોડાવો : Click karo

આ પણ વાંચો :

દક્ષિણ ગુજરાતમાં વરસાદે વધારી મુશ્કેલીઓ

આ આર્ટિકલને તમારા સોશિયલ મીડિયા પર શેર કરવા નીચેના આઈકોન પાર ક્લિક કરો.