વરસાદી સિસ્ટમ સક્રિય: અમદાવાદમાં વધુ વરસાદની શક્યતા
અમદાવાદમાં વરસાદી ઝાપટાંથી શહેર તરબતર, અનેક વિસ્તારોમાં પાણી ભરાયા
05 July 2026 Gujarat Updates Team: અમદાવાદમાં આજે બપોર બાદ હવામાનમાં મોટો ફેરફાર જોવા મળી શકે છે. પાલડી સ્થિત AMC સેન્ટ્રલ કંટ્રોલ રૂમના અધિકારીઓ પાસેથી પ્રાપ્ત માહિતી અને ઉપલબ્ધ હવામાન મોડેલિંગના આધારે આજે સાંજે લગભગ 4 વાગ્યાથી શહેરના અનેક વિસ્તારોમાં ભારે વરસાદ શરૂ થવાની સંભાવના વ્યક્ત કરવામાં આવી છે. ખાસ કરીને પશ્ચિમ અમદાવાદના થલતેજ, બોડકદેવ, જોધપુર, રાણીપ અને સરખેજ જેવા વિસ્તારોમાં ભારે વરસાદની આગાહી કરવામાં આવી છે.
અમદાવાદ માટે હવામાન વિભાગની આગાહી
IMD દ્વારા અમદાવાદ અને આસપાસના વિસ્તારો માટે જાહેર કરાયેલી આગાહી અનુસાર આગામી 24 કલાક દરમિયાન સામાન્ય રીતે વાદળછાયું વાતાવરણ રહેશે. એકથી બે તબક્કામાં વરસાદ અથવા ગાજવીજ સાથે વરસાદી ઝાપટાં પડી શકે છે. સમગ્ર રાજ્યમાં પણ આગામી સાત દિવસ દરમિયાન અલગ-અલગ વિસ્તારોમાં હળવાથી મધ્યમ વરસાદ ચાલુ રહેવાની શક્યતા દર્શાવવામાં આવી છે. અમદાવાદ જિલ્લામાં પણ ગાજવીજ અને 40થી 50 કિમી પ્રતિ કલાકની ઝડપે પવન ફૂંકાવાની શક્યતા વ્યક્ત કરવામાં આવી છે.
પાલડી સ્થિત AMC સેન્ટ્રલ કંટ્રોલ રૂમકંટ્રોલ રૂમના અંદાજ મુજબ થલતેજ અને બોડકદેવ વિસ્તારમાં ટૂંકા ગાળામાં અંદાજે 3થી 4 ઇંચ સુધી વરસાદ પડી શકે છે, જેના કારણે રસ્તાઓ પર પાણી ભરાવા, ટ્રાફિક ધીમો પડવો અને નીચાણવાળા વિસ્તારોમાં જળબંબોળ જેવી સ્થિતિ સર્જાવાની શક્યતા નકારી શકાય નહીં. આ ઉપરાંત જોધપુર, સરખેજ અને રાણીપ જેવા વિસ્તારોમાં પણ ભારે વરસાદની સંભાવના વ્યક્ત કરવામાં આવી છે. અમદાવાદવાસીઓ માટે વરસાદને લઈને મહત્વની આગાહી સામે આવી છે. C-DACના અનુમાન અનુસાર આજે સાંજે 4 વાગ્યે રાણીપ અને નિકોલમાં ભારે વરસાદ થઈ શકે છે. આ ઉપરાંત ઓઢવ અને વસ્ત્રાલમાં પણ વરસાદની શક્યતા છે. જ્યારે રાત્રે 8 વાગ્યા પછી થલતેજ, બોડકદેવ, જોધપુર અને સરખેજમાં વરસાદી ઝાપટાં પડી શકે છે. અગાઉ પણ આ વિસ્તારોમાં ભારે વરસાદ દરમિયાન ટ્રાફિક અને પાણી ભરાવાની સમસ્યા સર્જાતી રહી હોવાથી સ્થાનિક તંત્રે વિશેષ સતર્કતા દાખવી છે.
AMC એક્શન મોડમાં, ડીવોટરિંગ પંપ અને QRT સ્ટેન્ડબાય
સંભવિત ભારે વરસાદને ધ્યાનમાં રાખીને અમદાવાદ મ્યુનિસિપલ કોર્પોરેશને તમામ સંબંધિત વિભાગોને એલર્ટ પર રાખ્યા છે. થલતેજ, બોડકદેવ, જોધપુર અને સરખેજ સહિત સંવેદનશીલ વિસ્તારોમાં ડીવોટરિંગ પંપ, કેચપિટ સફાઈની ટીમો અને એન્જિનિયરિંગ સ્ટાફને સ્ટેન્ડબાય રાખવામાં આવ્યા છે.
પાલડી સ્થિત સેન્ટ્રલ કંટ્રોલ રૂમમાંથી સમગ્ર શહેરની લાઈવ CCTV મોનિટરિંગ કરવામાં આવી રહી છે. કોઈપણ વિસ્તારમાં પાણી ભરાવા, વૃક્ષ ધરાશાયી થવા અથવા ટ્રાફિકની ગંભીર સ્થિતિ સર્જાય તો ક્વિક રિસ્પોન્સ ટીમ (QRT) ને તાત્કાલિક સ્થળ પર મોકલવાની વ્યવસ્થા કરવામાં આવી છે. નાગરિકોને બિનજરૂરી મુસાફરી ટાળવા, ટ્રાફિક એડવાઇઝરીનું પાલન કરવા અને ભારે વરસાદ દરમિયાન સુરક્ષિત સ્થળે રહેવાની અપીલ કરવામાં આવી છે.
પશ્ચિમ અમદાવાદ સૌથી વધુ ભીંજાયું
અમદાવાદ મ્યુનિસિપલ કોર્પોરેશનના કંટ્રોલ રૂમ દ્વારા જાહેર કરાયેલા વરસાદના આંકડા મુજબ પશ્ચિમ ઝોનમાં સરેરાશ 26.71 મીમી વરસાદ નોંધાયો છે, જે શહેરના તમામ ઝોનમાં સૌથી વધુ છે. આ ઝોનના કેટલાક વિસ્તારોમાં તો વરસાદે જોરદાર હાજરી નોંધાવી હતી. રાણીપ વિસ્તારમાં 66 મીમી વરસાદ નોંધાયો, જ્યારે ચાંદખેડામાં 54.50 મીમી, મોટેરામાં 45.50 મીમી અને ઉસ્માનપુરામાં 33 મીમી વરસાદ વરસ્યો. વરસાદને કારણે અનેક આંતરિક માર્ગો પર પાણી ભરાયા હોવાના અહેવાલો સામે આવ્યા.
ઉત્તર-પશ્ચિમ ઝોનમાં પણ સારો વરસાદ
ઉત્તર-પશ્ચિમ ઝોનમાં સરેરાશ 45.93 મીમી સિઝનલ વરસાદ નોંધાયો છે. ગોતા વિસ્તારમાં 72 મીમી વરસાદ સાથે સૌથી વધુ નોંધ થઈ હતી. ઓગણજમાં 105 મીમી જેટલો ભારે વરસાદ નોંધાતા સ્થાનિક વિસ્તારોમાં પાણી ભરાવાની સ્થિતિ સર્જાઈ. મેમનગરમાં 58.50 મીમી અને બોડકદેવમાં 46 મીમી વરસાદ નોંધાયો. આ વિસ્તારોમાં વરસાદી પાણીના નિકાલ માટે મ્યુનિસિપલ તંત્ર સતત કામગીરીમાં લાગેલું હોવાનું જાણવા મળ્યું છે.
દક્ષિણ-પશ્ચિમ ઝોનમાં પણ વરસાદી માહોલ
દક્ષિણ-પશ્ચિમ ઝોનમાં સરેરાશ 31.29 મીમી વરસાદ નોંધાયો. સરખેજમાં 60.50 મીમી, જોધપુરમાં 50 મીમી, સાટેલાઇટ વિસ્તારમાં 51 મીમી તથા બોપલમાં 53 મીમી વરસાદ નોંધાતા વાહનચાલકોને મુશ્કેલીનો સામનો કરવો પડ્યો.શહેરના નવા વિકસતા વિસ્તારોમાં પણ વરસાદનું પ્રમાણ સારું રહેતાં હવામાનમાં નોંધપાત્ર ઠંડક અનુભવાઈ.
મધ્ય, ઉત્તર અને પૂર્વ ઝોનમાં મધ્યમ વરસાદ
સેન્ટ્રલ ઝોનમાં સરેરાશ 13.38 મીમી વરસાદ નોંધાયો. આશરવા, કાલુપુર અને દૂધેશ્વર સહિતના વિસ્તારોમાં મધ્યમ વરસાદ રહ્યો.ઉત્તર ઝોનમાં સરેરાશ 19 મીમી વરસાદ નોંધાયો, જ્યારે નરોડા, કોટરપુર અને સરદારનગર વિસ્તારમાં વરસાદનું પ્રમાણ સારું રહ્યું. પૂર્વ ઝોનમાં સરેરાશ 13.63 મીમી વરસાદ નોંધાયો. વસ્ત્રાલ, કઠવાડા, રામોલ અને વિરાટનગર વિસ્તારમાં વરસાદે વાતાવરણ ઠંડું બનાવ્યું.
ચોમાસું હવે સક્રિય તબક્કામાં
ભારતીય હવામાન વિભાગના જણાવ્યા મુજબ હાલમાં બંગાળની ખાડી ઉપર સર્જાયેલી લો-પ્રેશર સિસ્ટમ અને ઓફ-શોર ટ્રફના કારણે ગુજરાત સહિત પશ્ચિમ ભારત પર ચોમાસું સક્રિય છે. ગુજરાત પ્રદેશમાં સામાન્યથી સક્રિય ચોમાસાની સ્થિતિ જોવા મળી રહી છે અને અમદાવાદ સહિતના વિસ્તારોમાં આગામી દિવસોમાં હળવાથી મધ્યમ વરસાદ સાથે ગાજવીજ થવાની શક્યતા છે.
રસ્તાઓની સ્થિતિ પર પણ નજર
વરસાદ શરૂ થતાં જ શહેરના માર્ગો પર ખાડા અને રોડની સ્થિતિ અંગે પણ ચર્ચા તેજ બની છે. તાજેતરના અહેવાલો મુજબ અમદાવાદમાં અનેક માર્ગો પર વરસાદ બાદ નુકસાનની ચિંતા વ્યક્ત થઈ રહી છે, જેના કારણે મ્યુનિસિપલ તંત્ર માટે રસ્તાઓની જાળવણી મહત્વનો મુદ્દો બન્યો છે.
હાલની સ્થિતિને જોતા અમદાવાદમાં ચોમાસું હવે સક્રિય તબક્કામાં પ્રવેશી ગયું છે. હવામાન વિભાગના અનુમાન મુજબ આગામી કેટલાક દિવસો સુધી શહેરમાં વાદળછાયું વાતાવરણ રહેશે અને વચ્ચે-વચ્ચે વરસાદી ઝાપટાં ચાલુ રહી શકે છે. જો બંગાળની ખાડીમાં સક્રિય બનેલી સિસ્ટમ વધુ મજબૂત રહેશે તો અમદાવાદ સહિત મધ્ય ગુજરાતમાં વરસાદનું પ્રમાણ વધવાની પણ શક્યતા છે. તેથી નાગરિકોએ હવામાન વિભાગ અને સ્થાનિક તંત્રની સૂચનાઓ પર સતત નજર રાખવી જરૂરી રહેશે.
અમારી WhatsApp ચેનલ માં જોડાવો : Click karo
અમારી Telegram ચેનલ માં જોડાવો : Click karo
આ પણ વાંચો :
આ આર્ટિકલને તમારા સોશિયલ મીડિયા પર શેર કરવા નીચેના આઈકોન પાર ક્લિક કરો.
