દ્વારકામાં આંતરરાષ્ટ્રીય દવા કાંડનો પર્દાફાશ
નકલી દસ્તાવેજો અને કરોડોનો ખેલ!
24 June 2026 Gujarat Updates Team: ગુજરાતના દરિયાકાંઠા પરથી આંતરરાષ્ટ્રીય સ્તરે ગેરકાયદેસર દવાઓની હેરાફેરી થતી હોવાની શંકાઓ વચ્ચે દેવભૂમિ દ્વારકા જિલ્લા સ્પેશિયલ ઓપરેશન ગ્રુપ (SOG) એ એક એવી કાર્યવાહી કરી છે, જેને કારણે દવા સ્મગલિંગના મોટા નેટવર્ક અંગે અનેક ચોંકાવનારા ખુલાસા સામે આવ્યા છે. પોલીસે નાના માઢા ગામ નજીકથી એક વાહન રોકી અંદાજે રૂ. 80.77 લાખથી વધુ કિંમતનો પ્રેગાબાલિન કેપ્સ્યુલનો વિશાળ જથ્થો ઝડપી પાડ્યો છે. તપાસમાં સામે આવ્યું છે કે આ દવાઓ દરિયાઈ માર્ગે યમન મોકલવાની તૈયારી કરવામાં આવી રહી હતી.
પોલીસ સૂત્રોના જણાવ્યા અનુસાર, બાતમીના આધારે હાથ ધરાયેલી કાર્યવાહી દરમિયાન એક ટાટા એસ વાહનની તપાસ કરવામાં આવી હતી. શરૂઆતમાં વાહનચાલક દ્વારા રજૂ કરાયેલા દસ્તાવેજો નિયમિત જણાતા હતા, પરંતુ વધુ ચકાસણી કરતાં દસ્તાવેજો અને માલ વચ્ચે મોટો તફાવત સામે આવ્યો હતો.
બિલમાં એક, વાહનમાં બીજું
તપાસ દરમિયાન વાહનમાંથી કુલ 116 બોક્સ અને અન્ય પાર્સલ મળી આવ્યા હતા. રજૂ કરાયેલા બિલમાં માત્ર 80 બોક્સનો જ ઉલ્લેખ હતો. બાકીના 41 બોક્સ માટે કોઈ કાનૂની દસ્તાવેજ કે ખરીદીના પુરાવા ઉપલબ્ધ નહોતા. આ તફાવતને આધારે પોલીસે સમગ્ર જથ્થો કબ્જે કરી વધુ તપાસ શરૂ કરી હતી. પ્રાથમિક ગણતરી મુજબ જપ્ત કરાયેલા બોક્સોમાંથી અંદાજે 9.50 લાખથી વધુ પ્રેગાબાલિન કેપ્સ્યુલ મળી આવ્યા હતા. આંતરરાષ્ટ્રીય બજારમાં આ જથ્થાની કિંમત રૂ. 80 લાખથી વધુ હોવાનું અનુમાન છે.
શું છે પ્રેગાબાલિન અને કેમ છે ચર્ચામાં?
પ્રેગાબાલિન સામાન્ય રીતે ન્યુરોપેથિક પેઇન, એપીલેપ્સી, ફાઇબ્રોમાયલ્જિયા અને કેટલીક ન્યુરોલોજીકલ બીમારીઓની સારવારમાં ઉપયોગમાં લેવાતી દવા છે. જોકે છેલ્લા કેટલાક વર્ષોમાં તેના ગેરઉપયોગના કેસોમાં નોંધપાત્ર વધારો નોંધાયો છે. ભારત સરકારે પણ પ્રેગાબાલિનના વધતા દુરુપયોગને ધ્યાનમાં રાખીને તેના વેચાણ અને વિતરણ પર કડક નિયંત્રણ લાદવાના પગલાં લીધા છે. તાજેતરમાં આરોગ્ય મંત્રાલયે તેને વધુ કડક નિયમન હેઠળ લાવવાનો નિર્ણય કર્યો છે, જેથી બિનઅધિકૃત વેચાણ અને હેરાફેરી અટકાવી શકાય.
નિષ્ણાતોના મતે, આ દવાનો નશાકારક ઉપયોગ થતો હોવાથી આંતરરાષ્ટ્રીય કાળાબજારમાં તેની મોટી માંગ રહે છે. ખાસ કરીને મધ્યપૂર્વ અને આફ્રિકાના કેટલાક દેશોમાં આવા ફાર્માસ્યુટિકલ ઉત્પાદનોની ગેરકાયદેસર સપ્લાયના કેસો અગાઉ પણ સામે આવ્યા છે.
મુંબઈ-પુણેથી શરૂ થઈ દ્વારકા સુધી પહોંચેલી ચેઇન
તપાસ દરમિયાન પોલીસને જાણવા મળ્યું છે કે જપ્ત કરાયેલો જથ્થો મુંબઈ અને પુણે સ્થિત વિવિધ સપ્લાયરો પાસેથી મેળવવામાં આવ્યો હતો. ત્યારબાદ તેને અલગ-અલગ સ્થળોએ ભેગો કરીને નવા પેકિંગ, નકલી લેબલ અને બોગસ દસ્તાવેજોની મદદથી નિકાસ માટે તૈયાર કરવામાં આવ્યો હતો. સૂત્રો મુજબ, આરોપીઓએ માલને કાયદેસર ફાર્માસ્યુટિકલ એક્સપોર્ટ તરીકે દર્શાવવા માટે ખોટી માહિતીવાળા બિલ અને ટ્રાન્સપોર્ટ દસ્તાવેજો તૈયાર કર્યા હતા. જો આ કન્સાઇનમેન્ટ સમયસર પકડાયું ન હોત તો તે સલાયા બંદર મારફતે દરિયાઈ માર્ગે યમન પહોંચાડી દેવામાં આવ્યું હોત.
સલાયા બંદર કેમ બન્યું તપાસનું કેન્દ્ર?
ગુજરાતનો વિશાળ દરિયાકિનારો લાંબા સમયથી સુરક્ષા એજન્સીઓ માટે સંવેદનશીલ વિસ્તાર માનવામાં આવે છે. ખાસ કરીને કચ્છ અને દેવભૂમિ દ્વારકા જિલ્લાઓ દરિયાઈ માર્ગે થતી ગેરકાયદેસર હેરાફેરી અને સ્મગલિંગની પ્રવૃત્તિઓને કારણે અનેક વખત ચર્ચામાં રહ્યા છે. આ વિસ્તારોનો ઉપયોગ કરીને નશીલા પદાર્થો સહિતના પ્રતિબંધિત માલસામાનની હેરફેરના પ્રયાસો અગાઉ પણ સામે આવ્યા છે. આવા ગુનાઓને રોકવા માટે સુરક્ષા એજન્સીઓ સતત દરિયાઈ પેટ્રોલિંગ, સર્વેલન્સ અને ગુપ્તચર માહિતીના આધારે વિશેષ ઓપરેશનો ચલાવી રહી છે. નોંધનીય છે કે ભૂતકાળમાં પણ દેવભૂમિ દ્વારકા અને કચ્છના દરિયાકાંઠા વિસ્તારોમાંથી કરોડો રૂપિયાના નશીલા પદાર્થો જપ્ત કરવામાં આવ્યા હતા.
આ કેસમાં પણ સલાયા બંદરનું નામ સામે આવતા તપાસ એજન્સીઓએ બંદર સાથે સંકળાયેલા લોકો, ટ્રાન્સપોર્ટરો અને એક્સપોર્ટ ચેનલની પણ તપાસ શરૂ કરી છે.
પાંચ આરોપીઓ સામે ગુનો નોંધાયો
પોલીસે અત્યાર સુધી પાંચ વ્યક્તિઓની સંડોવણી સામે આવતા તેમની સામે ગુનો નોંધ્યો છે. આ તમામ સામે ડ્રગ્સ એન્ડ કોસ્મેટિક્સ એક્ટ તથા ભારતીય ન્યાય સંહિતાની વિવિધ જોગવાઈઓ હેઠળ કાર્યવાહી હાથ ધરવામાં આવી રહી છે. તપાસકર્તાઓ નાણાકીય લેવડદેવડ, બેંક ટ્રાન્ઝેક્શન, મોબાઇલ કૉલ રેકોર્ડ અને આંતરરાષ્ટ્રીય સંપર્કોની પણ ચકાસણી કરી રહ્યા છે. પ્રાથમિક રીતે આ સમગ્ર નેટવર્ક પાછળ વધુ લોકો સંકળાયેલા હોવાની શંકા વ્યક્ત કરવામાં આવી રહી છે.
આંતરરાષ્ટ્રીય એંગલથી તપાસ વધુ ગંભીર
પોલીસ અને ગુપ્તચર એજન્સીઓ આ કેસને માત્ર સ્થાનિક ગેરકાયદેસર દવા વેચાણ તરીકે નહીં પરંતુ આંતરરાષ્ટ્રીય સ્મગલિંગ રેકેટ તરીકે જોઈ રહી છે. કારણ કે માલનો અંતિમ ગંતવ્ય યમન હોવાનું સામે આવ્યું છે. જેના કારણે હવે દરિયાઈ માર્ગો, વિદેશી ખરીદદારો અને નિકાસ સંબંધિત કડીઓની પણ તપાસ કરવામાં આવી રહી છે.
કાયદા અમલવારી એજન્સીઓનું માનવું છે કે આ કેસ માત્ર એક કન્સાઇનમેન્ટ પૂરતો મર્યાદિત નથી. તેના પાછળ લાંબા સમયથી સક્રિય રહેલું નેટવર્ક હોઈ શકે છે, જે વિવિધ શહેરોમાંથી દવાઓ એકત્રિત કરીને વિદેશમાં સપ્લાય કરતું હોય.
ફાર્માસ્યુટિકલ હેરાફેરી સામે મોટી સફળતા
વિશેષજ્ઞોના મતે, પ્રેગાબાલિન જેવી દવાઓના ગેરકાયદેસર વેપાર સામે આ કાર્યવાહી મહત્વપૂર્ણ માનવામાં આવે છે.દેશના વિવિધ રાજ્યોમાં છેલ્લા કેટલાક સમયથી પ્રેગાબાલિનના ગેરઉપયોગ અને તેની ગેરકાયદેસર સપ્લાય સંબંધિત અનેક કિસ્સાઓ પ્રકાશમાં આવ્યા છે. દવાના દુરુપયોગને અટકાવવા અને તેના ગેરકાયદેસર વેપાર પર લગામ કસવા માટે કાયદા અમલવારી એજન્સીઓ સક્રિય બની છે. ગુપ્તચર માહિતીના આધારે વિવિધ સ્થળોએ દરોડા અને તપાસ અભિયાનો હાથ ધરી આવા નેટવર્કને નાબૂદ કરવા સતત કાર્યવાહી કરવામાં આવી રહી છે. અધિકારીઓનું માનવું છે કે આવા ગેરકાયદેસર રેકેટ સામે કડક પગલાં લેવાથી દવાઓના દુરુપયોગને રોકવામાં મદદ મળશે.
દેવભૂમિ દ્વારકા SOG દ્વારા કરાયેલ આ કાર્યવાહી માત્ર એક જથ્થો જપ્ત કરવાની ઘટના નથી, પરંતુ તે ગુજરાતના દરિયાઈ માર્ગોનો ઉપયોગ કરીને ચાલતા આંતરરાષ્ટ્રીય દવા સ્મગલિંગ નેટવર્ક સામેની મોટી સફળતા તરીકે જોવામાં આવી રહી છે.
હાલ પોલીસે સમગ્ર કેસની ઊંડાણપૂર્વક તપાસ શરૂ કરી છે અને આગામી દિવસોમાં વધુ ધરપકડો તથા મોટા ખુલાસાઓ થવાની શક્યતા નકારી શકાય તેમ નથી.
અમારી WhatsApp ચેનલ માં જોડાવો : Click karo
અમારી Telegram ચેનલ માં જોડાવો : Click karo
આ પણ વાંચો :
આ આર્ટિકલને તમારા સોશિયલ મીડિયા પર શેર કરવા નીચેના આઈકોન પાર ક્લિક કરો.
