અમેરિકાના રાષ્ટ્રપતિ ભવન પાસે ફાયરિંગ

ડોનાલ્ડ ટ્રમ્પ વ્હાઇટ હાઉસમાં હાજર ત્યારે ગોળીબાર, સમગ્ર વિસ્તાર સીલ

24 May 2026 Gujarat Updates Team: અમેરિકાના White House નજીક શનિવાર સાંજે બનેલી ગોળીબારની ચોંકાવનારી ઘટનાએ સમગ્ર વિશ્વનું ધ્યાન ખેંચ્યું છે. અમેરિકાના સૌથી સુરક્ષિત ગણાતા રાષ્ટ્રપતિ ભવન વિસ્તારની આસપાસ અચાનક ગોળીઓના ધડાકા સંભળાતા જ અફરાતફરીનો માહોલ સર્જાયો હતો. ઘટનાના સમયે મીડિયા પ્રતિનિધિઓ લાઈવ રિપોર્ટિંગ કરી રહ્યા હતા અને સુરક્ષા એજન્સીઓએ તાત્કાલિક કાર્યવાહી હાથ ધરી હતી. માહિતી અનુસાર, ગોળીબારની ઘટના વ્હાઇટ હાઉસ નજીક આવેલા 17th Street અને Pennsylvania Avenue વિસ્તારમાં બની હતી. અહેવાલો મુજબ એક શખ્સે સુરક્ષા ચેકપોઇન્ટ પાસે પહોંચી અચાનક ગોળીબાર શરૂ કર્યો હતો. ત્યારબાદ અમેરિકાની સિક્રેટ સર્વિસે જવાબી કાર્યવાહી કરતાં સંદિગ્ધને ઠાર માર્યો હતો. ઘટનામાં એક નિર્દોષ રાહદારીએ પણ ઈજા પહોંચી હોવાનું જણાવવામાં આવ્યું છે.

આ સમગ્ર ઘટનાનો સૌથી ચોંકાવનારો પાસો એ રહ્યો કે તે સમયે અમેરિકાના રાષ્ટ્રપતિ Donald Trump વ્હાઇટ હાઉસની અંદર હાજર હતા. મીડિયા રિપોર્ટ્સ અનુસાર તેઓ ઓવલ ઓફિસમાં ઈરાન સંબંધિત સંવેદનશીલ ચર્ચામાં વ્યસ્ત હતા. ગોળીબારની ઘટના બાદ સિક્રેટ સર્વિસે તરત જ સમગ્ર વિસ્તારને સુરક્ષા ઘેરામાં લઈ લીધો હતો.

વાયરલ વીડિયોમાં કેદ થયો ભયનો ક્ષણ
સોશિયલ મીડિયા પ્લેટફોર્મ X પર એક વીડિયો ખૂબ ઝડપથી વાયરલ થયો છે. વીડિયોમાં જોવા મળે છે કે એક મહિલા પત્રકાર વ્હાઇટ હાઉસ નોર્થ લોન પરથી પોતાના મોબાઈલ ફોન દ્વારા રિપોર્ટિંગ કરી રહી હતી. અચાનક જ પાછળથી સતત ગોળીઓના અવાજો સંભળાતા તે ગભરાઈ જાય છે અને તરત જમીન પર બેસી સુરક્ષિત થવાનો પ્રયાસ કરે છે.

આ પત્રકાર તરીકે ઓળખાતી Selina Wang એ પોતાની પોસ્ટમાં લખ્યું કે, “હું વ્હાઇટ હાઉસ નોર્થ લોન પરથી વીડિયો બનાવી રહી હતી ત્યારે અચાનક ગોળીબાર શરૂ થયો. એવું લાગતું હતું કે એકસાથે ડઝનોથી વધુ ગોળીઓ ફાયર થઈ રહી હતી. અમને તરત જ પ્રેસ બ્રીફિંગ રૂમમાં દોડવા કહેવામાં આવ્યું.”

I was in the middle of taping on my iPhone for a social video from the White House North Lawn when we heard the shots. It sounded like dozens of gunshots. We were told to sprint to the press briefing room where we are holding now. pic.twitter.com/iqdQwh4soq

— Selina Wang (@selinawangtv) May 23, 2026

ઘટનાના વીડિયોમાં ટીવી ક્રૂ અને અન્ય પત્રકારો પણ ગભરાટમાં દોડતા જોવા મળે છે. ઘણા મીડિયા કર્મચારીઓ જમીન પર સૂઈને પોતાનો જીવ બચાવતા દેખાયા હતા. આ દૃશ્યોએ સોશિયલ મીડિયા પર ભારે ચર્ચા જગાવી છે.

સુરક્ષા એજન્સીઓએ વિસ્તાર સીલ કર્યો
ગોળીબારની માહિતી મળતાં જ સિક્રેટ સર્વિસ, FBI અને સ્થાનિક પોલીસ દળોએ સમગ્ર વિસ્તારને ઘેરી લીધો હતો. ભારે હથિયારોથી સજ્જ અધિકારીઓએ વ્હાઇટ હાઉસ આસપાસના માર્ગો બંધ કરી દીધા હતા. કેટલાક સ્થળોએ કાઉન્ટર-સ્નાઈપર ટીમને પણ તૈનાત કરવામાં આવી હતી. FBIના ડિરેક્ટર Kash Patel એ પણ સોશિયલ મીડિયા પર જણાવ્યું કે એજન્સી ઘટનાની તપાસમાં સિક્રેટ સર્વિસને સહકાર આપી રહી છે. પ્રાથમિક તપાસમાં જાણવા મળ્યું છે કે હુમલાખોર અગાઉથી સુરક્ષા એજન્સીઓની નજરમાં હતો અને તેના વિરુદ્ધ ‘સ્ટે-અવે ઓર્ડર’ પણ જારી કરવામાં આવ્યો હતો.

અમેરિકાની સુરક્ષા વ્યવસ્થાને લઈને ઉઠ્યા પ્રશ્નો
વ્હાઇટ હાઉસ જેવી અતિસુરક્ષિત જગ્યા નજીક ગોળીબાર થવાની ઘટના બાદ અમેરિકાની સુરક્ષા વ્યવસ્થાને લઈને ગંભીર પ્રશ્નો ઊભા થયા છે. વિશ્વભરમાં સૌથી કડક સુરક્ષા ધરાવતા ક્ષેત્રોમાં વ્હાઇટ હાઉસનો સમાવેશ થાય છે. છતાં હુમલાખોર સુરક્ષા ચેકપોઇન્ટ સુધી કેવી રીતે પહોંચી ગયો તે બાબત હાલ ચર્ચાનો વિષય બની છે. રાજકીય નિષ્ણાતોનું માનવું છે કે છેલ્લા કેટલાક મહિનાઓમાં અમેરિકામાં રાજકીય હિંસા અને સુરક્ષા ભંગની ઘટનાઓમાં વધારો થયો છે. થોડા અઠવાડિયા પહેલાં પણ વ્હાઇટ હાઉસ કરસ્પોન્ડન્ટ્સ ડિનર નજીક હુમલાની ઘટના સામે આવી હતી.

સોશિયલ મીડિયા પર ભારે ચર્ચા
ઘટના બાદ સોશિયલ મીડિયા પર લાખો લોકો વીડિયો શેર કરી રહ્યા છે. કેટલાક યુઝર્સે સુરક્ષા વ્યવસ્થાની પ્રશંસા કરી છે તો કેટલાકે વ્હાઇટ હાઉસની સુરક્ષા પર સવાલ ઉઠાવ્યા છે. અનેક લોકોએ પત્રકારોની હિંમતની પણ પ્રશંસા કરી છે. ઘણા અમેરિકન નાગરિકોએ આ ઘટનાને ચિંતાજનક ગણાવી છે અને રાષ્ટ્રપતિ સુરક્ષા વ્યવસ્થાને વધુ મજબૂત બનાવવાની માંગ કરી છે. બીજી તરફ રાજકીય વર્તુળોમાં પણ આ ઘટનાને ગંભીરતાથી લેવામાં આવી રહી છે.

“Thank you to our great Secret Service and Law Enforcement for the swift and professional action taken this evening against a gunman near the White House…” – President Donald J. Trump pic.twitter.com/PCfmZgSC1w

— The White House (@WhiteHouse) May 24, 2026

ટ્રમ્પ સુરક્ષિત, પરંતુ ચિંતા યથાવત
સિક્રેટ સર્વિસના નિવેદન મુજબ રાષ્ટ્રપતિ ડોનાલ્ડ ટ્રમ્પ સંપૂર્ણપણે સુરક્ષિત છે અને તેમને કોઈ નુકસાન પહોંચ્યું નથી. ગોળીબાર બાદ થોડા સમય માટે વ્હાઇટ હાઉસમાં લોકડાઉન જેવી સ્થિતિ ઊભી થઈ હતી, પરંતુ બાદમાં સુરક્ષા એજન્સીઓએ પરિસ્થિતિ નિયંત્રણમાં હોવાનું જાહેર કર્યું હતું. આ ઘટના અમેરિકાની રાજકીય અને સુરક્ષા વ્યવસ્થાને લઈને ફરી એકવાર ચર્ચાના કેન્દ્રમાં આવી છે. વિશ્વના સૌથી શક્તિશાળી દેશના રાષ્ટ્રપતિ ભવન નજીક થયેલી આ ગોળીબારની ઘટનાએ આંતરરાષ્ટ્રીય સ્તરે પણ ચિંતા વધારી છે. તપાસ એજન્સીઓ હાલ હુમલાખોરના હેતુ, તેના સંપર્કો અને સુરક્ષા ભંગના તમામ પાસાઓની ઊંડાણપૂર્વક તપાસ કરી રહી છે.

www.gujaratupdates.com

અમારી WhatsApp ચેનલ માં જોડાવો : Click karo
અમારી Telegram ચેનલ માં જોડાવો : Click karo

આ પણ વાંચો :

ટ્રમ્પ કાર્યક્રમમાં હુમલાનો આરોપી : નાસા ફેલો બન્યો ગનમેન

આ આર્ટિકલને તમારા સોશિયલ મીડિયા પર શેર કરવા નીચેના આઈકોન પાર ક્લિક કરો.