રિયાન પરાગ પર મોટી કાર્યવાહી કેમ થઇ ?
30 April, 2026 Gujarat Updates Team : ભારતીય ક્રિકેટમાં શિસ્ત અને વ્યાવસાયિકતા અંગે ફરી એકવાર મોટો મુદ્દો સામે આવ્યો છે. BCCIએ Indian Premier League 2026 દરમિયાન Rajasthan Royalsના કેપ્ટન રિયાન પરાગ સામે કડક કાર્યવાહી કરી છે. બોર્ડે તેમને મેચ ફીના 25 ટકા દંડ સાથે એક ડિમેરિટ પોઈન્ટ ફટકાર્યો છે.
ઘટનાનું કારણ શું?
IPL 2026ની 40મી મેચમાં Rajasthan Royals અને Punjab Kings વચ્ચે રમાયેલી મેચ દરમિયાન રિયાન પરાગ ડ્રેસિંગ રૂમમાં ઈ-સિગારેટ (વેપિંગ) કરતાં કેમેરામાં કેદ થયા હતા. ભારતમાં, ‘ધ પ્રોહિબિશન ઓફ ઇલેક્ટ્રોનિક સિગારેટ એક્ટ’ (PECA), 2019 હેઠળ ઇ-સિગારેટ અને વેપિંગ પર પ્રતિબંધ છે. આ કાયદા હેઠળ, આ ઉત્પાદનોના ઉત્પાદન, વેચાણ, ખરીદી, આયાત, નિકાસ અને જાહેરાત પર પ્રતિબંધ છે. ઉલ્લંઘનના પરિણામે ભારે દંડ અને જેલની સજા પણ થઈ શકે છે.. આ વીડિયો સોશિયલ મીડિયા પર ઝડપથી વાયરલ થયો અને ભારે ચર્ચાનો વિષય બન્યો. માહિતી મુજબ, આ ઘટના મેચ દરમિયાન રાજસ્થાન રોયલ્સની ઇનિંગ્સ દરમિયાન બની હતી, જ્યારે ટીમ લક્ષ્યનો પીછો કરી રહી હતી.
કયા નિયમનો ભંગ થયો?
BCCIના નિવેદન અનુસાર, રિયાન પરાગે IPL આચારસંહિતાના લેવલ-1 હેઠળનો નિયમ તોડ્યો છે, જે “રમતની પ્રતિષ્ઠાને નુકસાન પહોંચાડે તેવા વર્તન” સાથે સંબંધિત છે. ભારતમાં ઈ-સિગારેટ (વેપિંગ) પર પ્રતિબંધ હોવાના કારણે આ મુદ્દો વધુ ગંભીર બની ગયો છે.
પરાગે શું કહ્યું?
રિપોર્ટ મુજબ, રિયાન પરાગે પોતાની ભૂલ સ્વીકારી છે અને મેચ રેફરી દ્વારા આપવામાં આવેલી સજા માની લીધી છે.
IPL 2026ની આ ઘટના ફરી સાબિત કરે છે કે આંતરરાષ્ટ્રીય સ્તરની લીગમાં ખેલાડીઓ માટે માત્ર પ્રદર્શન જ નહીં, પરંતુ શિસ્ત અને જવાબદારી પણ એટલી જ મહત્વપૂર્ણ છે. Riyan Parag પર લેવાયેલ કાર્યવાહી અન્ય ખેલાડીઓ માટે ચેતવણીરૂપ બની શકે છે.
