જાણો કેસર કેરી નો ભાવ
Talala, Gir Somnath, Gujarat 20 April 2026 : તાલાલા માર્કેટિંગ યાર્ડમાં પ્રખ્યાત કેસર કેરીની સિઝનનો શુભ પ્રારંભ થયો છે. યાર્ડમાં કેસર કેરીની સુગંધથી વાતાવરણ મહેકી ઉઠ્યું હતું અને સૌરાષ્ટ્રભરમાંથી વેપારીઓ મોટી સંખ્યામાં ઉમટ્યા હતા. પ્રથમ દિવસે કુલ 10 કિલોગ્રામના 10,400 બોક્સની આવક નોંધાઈ હતી. પરંપરા મુજબ પ્રથમ બોક્સની હરાજી ગૌમાતા માટે કરવામાં આવી હતી. આજના દિવસે સારી ગુણવત્તાની કેસર કેરીનો ભાવ ₹1,250 પ્રતિ બોક્સ સુધી રહ્યો હતો, જ્યારે નબળી ગુણવત્તાની કેરીના ભાવ લગભગ ₹450 આસપાસ નોંધાયા હતા.
ગત વર્ષની સરખામણીએ આ વર્ષે આવક અને ભાવ બંનેમાં નોંધપાત્ર ઘટાડો જોવા મળ્યો છે. ગયા વર્ષે પ્રથમ દિવસે 14,500 બોક્સની આવક સાથે ઉત્તમ કેરીનો ભાવ ₹1,500 પ્રતિ બોક્સ સુધી ગયો હતો.
વિદેશી બજારમાં પહેલો જથ્થો પહોંચ્યો
આ સીઝનની ખાસ વાત એ છે કે સ્થાનિક બજાર શરૂ થાય તે પહેલા જ કેસર કેરીનો પહેલો નિકાસ જથ્થો અમેરિકા પહોંચ્યો છે. 15 એપ્રિલે 800 બોક્સ (અંદાજે 2.5 ટન)કેસર કેરીનો જથ્થો હવાઈ માર્ગે વોશિંગ્ટન મોકલાયો હતો.આ કેરીઓને પેકહાઉસમાં આધુનિક પ્રક્રિયાઓ જેમ કે: વોશિંગ, ગ્રેડિંગ, હોટ વોટર ટ્રીટમેન્ટ, પ્રી-કૂલિંગ , રાઇપનિંગ પછી પેક કરવામાં આવી હતી. નિકાસ પહેલાં અમદાવાદ નજીક બાવળા ખાતે irradiation પ્રક્રિયા પણ કરવામાં આવી હતી.
નિકાસમાં પડકારો
નિકાસકારો માટે આ વર્ષે પડકારરૂપ પરિસ્થિતિ સર્જાઈ છે. હવાઈ પરિવહન ખર્ચમાં લગભગ 50%નો વધારો નોંધાયો છે — ગયા વર્ષે ₹400 પ્રતિ કિલો હતો, જે હવે વધીને ₹600 પ્રતિ કિલો થયો છે. વૈશ્વિક તણાવને કારણે યુરોપ, ગલ્ફ અને યુકેમાં માંગ હોવા છતાં નિકાસમાં થોડો ઘટાડો થવાની શક્યતા છે.
ગત વર્ષની કામગીરી અને આ વર્ષની અપેક્ષા : 2025ની સીઝનમાં:
* કુલ 4,49,450 બોક્સ (10 કિ.ગ્રા)નું વેપાર થયું
* સરેરાશ ભાવ ₹560 પ્રતિ બોક્સ રહ્યો
* ખેડૂતોને કુલ ₹25.17 કરોડની આવક મળી
ઇતિહાસ મુજબ કેસર કેરીના ભાવમાં સતત વધારો નોંધાયો છે — 2013-14માં ₹254 થી વધીને હવે ₹560 સુધી પહોંચ્યા છે.
યાર્ડના અધિકારીઓએ ખેડૂતોને ઉત્તમ ગુણવત્તાની, સારી રીતે ગ્રેડ કરેલી કેરી લાવવા અપીલ કરી છે જેથી વધુ સારો ભાવ મળી શકે. વહેલી શરૂઆતને કારણે બજારમાં ઝડપથી વેપાર વધવાની સંભાવના વ્યક્ત કરવામાં આવી છે.આ વર્ષે સીઝનની શરૂઆત વહેલી થઈ હોવા છતાં, ભાવ અને આવકમાં ઘટાડો ચિંતાજનક છે. છતાં પણ સ્થાનિક અને આંતરરાષ્ટ્રીય માંગને ધ્યાનમાં રાખતા, કેસર કેરીના વેપારમાં આગામી દિવસોમાં તેજી આવવાની આશા વ્યક્ત કરવામાં આવી રહી છે.
www.gujaratupdates.com
