શું છે ત્રિશાના “હું CM બનવા માગું છું” નિવેદનની હકીકત
ત્રિશાનો 2004નો જૂનો વીડિયો ફરી વાયરલ, સોશિયલ મીડિયા ગરમાયું
05 May 2026 Gujarat Updates Team : તમિલનાડુની તાજેતરની વિધાનસભા ચૂંટણીમાં અભિનેતા-રાજકારણી વિજયના પક્ષ તમિલગા વેત્રી કઝગમ (TVK)એ 108 બેઠકો જીતીને સૌથી મોટા પક્ષ તરીકે સ્થાન મેળવ્યું છે. આ પરિણામે રાજ્યના રાજકારણમાં નવી દિશા જોવા મળી રહી છે.
આ વચ્ચે અભિનેત્રી ત્રિશા કૃષ્ણનનો 2004નો એક જૂનો વીડિયો સોશિયલ મીડિયા પર ઝડપથી વાયરલ થઈ રહ્યો છે. આ વીડિયોમાં ત્રિશા મજાકીય અંદાજમાં કહે છે કે, “હું તમિલનાડુની ચીફ મિનિસ્ટર બનવા માગું છું…રાહ જુઓ, તમે 10 વર્ષમાં જોઈશો.” તેમની આ વાત હાલની રાજકીય પરિસ્થિતિ સાથે જોડાઈને ચર્ચાનો વિષય બની છે. વિડિયોમાં રાજકારણ વિશે પૂછતાં ત્રિશાએ હસતા કહ્યું હતું કે, “પહેલા તમે મને વોટ આપીને જીતાડો, પછી હું શું કરું તે બતાવીશ.” આ નિવેદન હવે ફરી ચર્ચામાં આવ્યું છે અને લોકો વિવિધ પ્રતિક્રિયાઓ આપી રહ્યા છે.
ચૂંટણી જીત પછી અહેવાલો અનુસાર ત્રિશાએ વિજયના નિવાસસ્થાને જઈ તેમને અભિનંદન પાઠવ્યા હતા. બંને અનેક પ્રસંગોએ સાથે જોવા મળ્યા છે. સોશિયલ મીડિયા અને મિડિયામાં ઘણીવાર ત્રિશા અને વિજયને “લવર્સ” તરીકે જોડીને ચર્ચા થાય છે, પરંતુ આ સંબંધ અંગે કોઈ સત્તાવાર પુષ્ટિ બંને તરફથી કરવામાં આવી નથી. તેથી આ બાબત હાલ અફવા તરીકે જ જોવામાં આવે છે.
ફિલ્મી કારકિર્દી અને હિન્દી ફિલ્મ સફર
ત્રિશા દક્ષિણ ભારતીય ફિલ્મ ઈન્ડસ્ટ્રીની અગ્રણી અભિનેત્રીઓમાંની એક છે. તેમણે તમિલ, તેલુગુ અને મલયાલમ ફિલ્મોમાં નોંધપાત્ર કામ કર્યું છે. તેમને પ્રથમ વખત 1999માં ફિલ્મ “જોડી”માં એક નાની સહાયક ભૂમિકામાં જોવા મળ્યા હતા અને પછી 2000માં ફાલ્ગુની પાઠકના ગીત “મારી ચુનર ઉડ ઉડ જાયે”ના મ્યુઝિક વિડિયોમાં દેખાયા હતા. તેમણે 2010માં રિલીઝ થયેલી ફિલ્મ “ખટ્ટા મીઠા”માં અભિનેતા અક્ષય કુમાર સાથે કામ કર્યું હતું. આ ફિલ્મમાં તેઓ મુખ્ય મહિલા ભૂમિકામાં જોવા મળ્યા હતા અને બોલિવૂડમાં તેમની એન્ટ્રી તરીકે તેને ઓળખવામાં આવે છે.
ત્રિશાએ તાજેતરમાં નિર્દેશક મણિરત્નમની ફિલ્મ “ઠગ લાઈફ”માં અભિનય કર્યો હતો, જેમાં કમલ હાસન મુખ્ય ભૂમિકામાં હતા. હવે તેઓ સૂર્યા સાથેની આગામી ફિલ્મ “કરુપ્પુ”ની રિલીઝની રાહ જોઈ રહ્યા છે, જેનું નિર્દેશન આરજે બાલાજીએ કર્યું છે.
રાજકારણ અને ફિલ્મી જગત વચ્ચેનો આ રસપ્રદ સંયોગ હાલ ચર્ચાના કેન્દ્રમાં છે, જ્યારે અફવાઓ અને હકીકતો વચ્ચે લોકો પોતપોતાના અંદાજ લગાવી રહ્યા છે.
વાંચો :વિજયનો પરિચય , નેટવૉર્થ , તેમની પાર્ટી TVK અને રણનીતિ – એક સંપૂર્ણ એનાલિસિસ
અમારી WhatsApp ચેનલ માં જોડાવો : Click karo
અમારી Telegram ચેનલ માં જોડાવો : Click karo
અમારા Facebook પેજને ફોલો કરો: Click karo
આ આર્ટિકલને તમારા સોશિયલ મીડિયા પર શેર કરવા નીચેના આઈકોન પાર ક્લિક કરો.
