મૃતદેહ બહાર કાઢતા ખુલશે રહસ્ય: ઢોસાના ખીરા કેસમાં નવો વળાંક

Ahmedabad, 07 April 2026: અમદાવાદ શહેરના ચાંદખેડા વિસ્તારમાં બનેલી એક હૃદયદ્રાવક ઘટનાએ શહેરમાં ચકચાર મચાવી છે. બજારમાંથી લાવવામાં આવેલા ઢોસાના તૈયાર ખીરામાંથી બનેલા ખોરાકને કારણે ફૂડ પોઈઝનિંગ થયાની શંકા વચ્ચે એક જ પરિવારની બે નાનકડી દીકરીઓના મોત થયા છે, જ્યારે માતા-પિતા હાલ હોસ્પિટલમાં સારવાર હેઠળ છે.

તપાસમાં આવ્યો નવો વળાંક
બાળકીના મોત બાદ પરિવારે પોલીસને જાણ કર્યા વગર અંતિમવિધિ કરી દીધી હતી. જોકે, બંને બાળકીઓના શંકાસ્પદ મોતને ધ્યાનમાં રાખીને પોલીસે વધુ તપાસ શરૂ કરી છે. ફોરેન્સિક સાયન્સ લેબોરેટરી (FSL)ની હાજરીમાં અઢી મહિનાની બાળકીનો મૃતદેહ બહાર કાઢી પોસ્ટમોર્ટમ માટે મોકલવામાં આવ્યો છે. ત્રણ વર્ષની બાળકીનો પોસ્ટમોર્ટમ પહેલેથી જ ડૉક્ટરોની પેનલ દ્વારા કરવામાં આવ્યો છે. ઉપરાંત, ખીરાના નમૂનાઓ તેમજ પરિવારના ઘરની પણ તપાસ કરવામાં આવી રહી છે.

શું છે સમગ્ર મામલો?
માહિતી મુજબ, પરિવારે ચાંદખેડાના આઈઓસી રોડ પર આવેલી એક સ્થાનિક ડેરીમાંથી ઢોસા માટેનું તૈયાર ખીરું ખરીદ્યું હતું. 1 એપ્રિલની સાંજે બનાવેલા ઢોસા પરિવારજનો દ્વારા ખાધા બાદ, બીજા દિવસે ફરી એ જ ખીરામાંથી ઢોસા બનાવવામાં આવ્યા હતા. ત્યારબાદ પરિવારના સભ્યોની તબિયત અચાનક બગડવા લાગી અને ઉલ્ટી-જુલાબ જેવી તકલીફો જોવા મળી.પ્રાથમિક સારવાર બાદ થોડો સુધારો લાગ્યો હતો, પરંતુ સ્થિતિ ફરી ખરાબ થતાં તેમને હોસ્પિટલમાં ખસેડવામાં આવ્યા. આ દરમિયાન 4 એપ્રિલે માત્ર અઢી મહિનાની બાળકીનું મોત થયું, જ્યારે 5 એપ્રિલે ત્રણ વર્ષની દીકરીએ પણ દમ તોડી દીધો.

ડેરી માલિકનો દાવો
સંબંધિત ડેરીના માલિકે કોઈપણ બેદરકારી નકારી કાઢી છે. તેમના જણાવ્યા મુજબ, એ જ ખીરું અન્ય ઘણા ગ્રાહકોને પણ વેચાયું હતું અને કોઈએ પણ આવી તકલીફની ફરિયાદ કરી નથી. તેઓએ કહ્યું કે, “અમે દરરોજ 100-120 કિલો ખીરું વેચીએ છીએ અને અન્ય કોઈ ગ્રાહકને સમસ્યા નથી થઈ.”

મુખ્ય પ્રશ્નો
આ કેસમાં ઘણા પ્રશ્નો ઉભા થયા છે:

• અઢી મહિનાની બાળકીનું મોત કેવી રીતે થયું, જ્યારે તેને સામાન્ય રીતે ઘન આહાર આપવામાં આવતો નથી?
• શું ખરેખર ખીરામાં કોઈ ઝેરી તત્વ હતું?
• કે પછી અન્ય કોઈ કારણ જવાબદાર છે?

તંત્રની કાર્યવાહી
ચાંદખેડા પોલીસે અકસ્માત મોતનો ગુનો નોંધી તપાસ શરૂ કરી છે. ફૂડ અને ડ્રગ્સ વિભાગ તથા FSL દ્વારા સેમ્પલની તપાસ ચાલી રહી છે. અધિકારીઓ પોસ્ટમોર્ટમ અને લેબોરેટરી રિપોર્ટની રાહ જોઈ રહ્યા છે, જેના આધારે સાચું કારણ બહાર આવશે.